متردد بقرار الطلاق وأخاف أن أظلم زوجتي

مشكلتي كالتالي تزوجت بنت عمي و كنت احبها و مغرم فيها في ليلة الدخلة لم يتم الأمر ماادري ايش المشكلة لدرجة اني انصدمت من نفسي كيف كل هالحماس اللي فيني وما قدرت أسوي شي و بعدها قعدت منصدم ومع ذلك كانت زوجتي صابرة علي و قالت عادي و عدا أول شهر و نص ما صار شيء و راحت زيارة لأهلها و قالت أنا مااقدر أرجع للمدينة اللي انت فيها خلينا ننقل لمدينة ثانية وقتها أنا زعلت و قعدت شهر ما كلمتها و بعدين رحت لها وراضيتها على أساس نرجع لكن رفضت الرجعة قلت مو مشكلة نصبر شوي بعدها كلمتني قالت لي انا برجع غصبن عني ماابي المدينة اللي انت فيها يوم قالت انها مغصوبة انا تنرفزت وقلت لها لو مغصوبة على الرجعة للمدينة اللي انا فيها تعالي شيلي أغراضك و سامحينا انا ماني مستعد أقعد افكر هي راجعة عشاني و لا غصب عموما أنا للحين ما طلقت لكن ناوي و متردد لاني خايف أظلمها و أكون أنا السبب لأن البداية ما كانت موفقة مني و بنفس الوقت خلاص أحس بعد اللي صار نفسي لا ترغبها و خايف بعد طلاقي منها اظلمها و أنا مااحب الظلم لكن ماني قادر أعيش معها اعطوني حلولكم

لو طلقت زوجتك بهذه السرعة ستكون قد ظلمتها بالتأكيد ، خاصه بعد فشلك في إقامه علاقه حميمه بينكما مما أدى إلى انطلاق سلبي لعلاقتكما . تجاوز ما قالته لك وحاول أن تقنعها برحله صغيره ، داخل البلد أو خارجها ، حسب إمكانياتك ، تمضيان فيها بعض الوقت في رحله سياحيه تخفف من الضغط الذي تشعران به وتقربكما من بعض . إذا حلت المشكلة الأساسية ، ستستطيع بكلمه رقيقه منك إقناعها بالعودة إلى مدينتك التي كانت قد وافقت سابقا على العيش فيها . الأسلوب في الكلام وإظهار المشاعر والمودة يؤثران أكثر بكثير من التحدي الجاف خاصه إذا أظهرت لزوجتك تمسكك بها ورغبتك في حياة زوجيه سعيدة. وأخيرا اشاركك مقالة عن متى يجب اخذ قرار الطلاق واتمنى ان تساعدك في اتخاذ قرارك.