جوزي عنده جشع وحب للمال ولا يحترمني

المشكلة:انا متجوزه من فتره طويله جدا وصادفتني الكتير من المشاكل والعقبات في حياتي مع جوزي والحمد لله ربنا صبرني على ظلم جوزي واهله ,اللي كان مصبرني هم اولادي وكنت بقول ربنا مش بيضيع حق حد مظلوم,بعد سنين من المعاناه ربنا هدى جوزي ليا والحمد لله,الفتره دي ومن حوالي 3 شهور حاسه انه جوزي متغير اوي بقى عصبي جدا اكلمه بالذوق والابتسامه يجاوبني بشتيمه ويزعق وممكن يمد ايده في بعض الاوقات وما فيش عنده غيره الشتيمه وهتطلقي وهتجني على نفسك وتطلقي وهرميكي وبقى بخيل جدا مع العلم انه بقاله فتره ربنا مهديه وكان بيديني مصروف للعيال,انا واولادي ليا فلوس قلتله وانا ببتسم انت هتاخدها كلها انا محتاجه شويه منها علشان عاوزه اشتري شويه حجات للعيال لاني مسافره ازور اهلي,بص ليا بشكل مرعب وقعد يزعق ويشتم ويشتم اهلي ويقولي انتي بترسمي على ايه بتخططي لايه,هوا انتي ليكي حاجه,دي فلوسي ,قلتله انا كل مره مره بديك فلوسي وفلوس عيالي لكن انا محتاجه شويه فلوس اجهز العيال ومصاريف للسفر قالي مش هتاخدي حاجه,هوا مش بخيل على اهله وعنده جشع وحب للمال بخاف على القرش اكتر من خوفه على عياله ومش عارفه ايه حكايه التهديد بالطلاق دي,كل ما اناقشه بحاجه يهددني بالطلاق انا اللي مصبرني عليه هم عيالي,داخلين في سن مراهقه ,بقالي 20 سنه مجوزه وجوزي عنده فلوس كتير اوي ومش راضي يشتري بيت ملك وكل حاجه بكتبها باسم امه,يا ريت حد يساعدني انا بقالي 20 سنه مستحمله الغلب ,دلوقتي انا كبرت في العمر والصحه ما بقتش تستحمل ,وهو مش احترم العشره اللي بينا ولا احترم اني بقيت كبيره في العمر مش كبيره اوي يعني ولا احترم وجود الاولاد انا امبارح كنت اعيط وفجاه حسيت بوجع نصفي في جسمي والحمد لله اتحسنت شويه بعد 12 ساعه

الحل:ياعزيزتي مع احترامي لكلام الأخ رجل بسيط الا اني اخالفه الراي في كل ماقال لك وعايزكي تعرفي ان الرجل اللي مايحترم مراته وام عياله ويضربها ويهينها مش راجل ولاعنده ذرة من الرجولة ابدا ولن يحسن المعاملة لك الشخص اللي مايقدر الحياة الزوجية ولايصونها يبقى لايستاهل العيش معه الى متى وانت راضية بالوضع دا اولادك اصبحوا كبار وفاهمين الوضع تماما لاتخافي عليهم ابدا وفوق كلدا بخيل جدا ولايصرف عليك وعلى أولاده وحب المال مسيطر عليه تماما ربنا عزوجل قال – وعاشروهن بالمعروف – وقال أيضا- امساك بمعروف او تسريح باحسانا- وارى ان الطلاق خير لك من العيشة مع شخص هكذا وفيه صون لك ولكرامتك ولاحد يلومك ان طلبت الطلاق منه والقرار يعود لك فانت الوحيدة المتضررة من العيش والبقاء مع شخص لايقيم للحياة الزوجية قدرا ولايراعي الله فيك وفي أولاده