زوجي مصر على الطلاق وأنا لا أريد

المشكلة:انا بنت عمري ٢٦سنة ..من بيئة مدينة متوسطة الحال ..متعلمة ..توفى والدي من سنتين الله يرحمه وكان كل شي بحياتي وكنت جدا جدا مقربة الو ..وبوفاته تعبت كتير لكن صبرني ربي ..وبعد وفاته بيومين اتقدملي شب واهلي بلغوهم انو عنا حالة وفاة ..الجماعة ضلو ع اتصال دائم باهلي لمدة خمس شهور كنت خلالها رافضة جدا الارتباط بهاد الشب بدون ما اشوفه بس لاني كنت شايفة انو ما في توافق بناء على الصفات المبدئية ..واختلفت مع امي كتير بسبب رفضي الو بدون ما اشوفه وبالاخر وافقت اشوفه ارضاء لأمي ..ولما شفته ارتحتله ..استخرت رب العالمين فيه كتير ومشيت الأمور وخطبنا ١١شهر كان خلالهم اجمل والطف رجل وكنت دائما اقول هاد عوض رب العالمين الي عن وفاة ابوي وكنت احكيله هيك ..خبرتي بالخطبة انو زعلان لانو بس تتزوج انو راح تروح تعيش عند ابنها برا الاردن وهو متعلق فيها كونه اخر اولادها وعاش معها لحالهم فترة طويلة ..لهيك حكيتله اني بدي امه عندي ببيتي وبدي تباركلنا حياتنا .. وفعلا تزوجت من الإنسان الي بشوفه متدين وحاج ومحترم وحنون ..ومن اول شهر امه تركت بيتها واجت تعيش عندي وكنت اقدملها كل احترام ممكن ..بس كانت الظروف اسوء من ما توقعت ..عمتي بتنام بعد نص الليل وبتصحى من الفجر وبدها انام واصحى معها ..كنت أنام انا بعد طلوع زوجي ع الشغل لاني مش متعودة عليه واصحى بعد ساعتين أعماللها فطور ويمكن ارجع انام بعد هيك ويمكن لأ ..تفاجأت بطباع عمتي الصعبة وبانتقاداتها للبسي وطبخي ونومي وحتى كلامي ..وكانت ترفض تناديني باسمي ..وتناديني "ولية"..مع كل انتقاداتها وتعليقاتها ورفضها لطبخي وتعليقها عليه "قرف"..ما عمري رديت عليها بواجب أو كلمة ..زعلت عمتي بعد شهر وطلعت من عندي وسبب زعلها اني بضل نائمة للظهر وكانت الدنيا رمضان طبعا وما في طبخ أو شي ..اهل زوجي كلهم زعلو بعد طلعت عمتي وحسيتهم قلبو علي..صرت اسلم ما حد يرد السلام ..وأمد ايدي اسلم على عمتي تلف وجها عني ..اسمع اخبار العيلة من البنات الصغار وزوجي يخبي عني كل شي وانصدم من كتير أمور انا اخر حد بكل العيلة يعرفها ..صرت اسمع تسجيل مكالمات زوجي لانو كان يسجل مكالماته. .وطبعا انصدمت بكمية الانتقادات الي والتدخلات بحياتنا مع سكووووت تام من زوجي ..كنت اراجعه بأمور اكون سمعتها من بنات العيلة واخفي أمور ما سمعتها من حد لحتى ما يعرف اني بسمع تسجيلات ..واسمع خواته وخوانو كيف بحكو عن اهلي وكيف يتدخلو بزيارات اهلي الي أو زياراتي الهم ولبسي ويحكولو لا تحكي لمرتك وهو يخبئ ..تعرض لموقف انو اخوه يصرخ علي وزوجي ساكت وأخوه التاني يجي لنص بيتي ويصرخ علي وزوجي ساكت وانا ساكتة احتراما الو ..لحد ما اجو خواته لبيتنا وبهدلوني ودافعت عن حالي بكل ادب وزوجي قاعد ساكت ولما طلع الموضوع عن سيطرتي تركت الجلسة وقمت وقلت "هادي جلسة تحقيق ما راح اقعد فيها"ودخلت غرفتي لحقني زوجي يشدني ولحقتني أخته تكمل صراخ وتحط أيدها ع خصرها وتحكي بأسلوبها ..عصبت كتير ورنيت لاهلي ..واجو ..وتفاهمو معو ..وحكولو نبعد عن اهلي واهلو اسبوعين بعدين بنلتقي ببيت العييلة وبنسلم ع بعض كانو ما صار شي ..واتفق هيك مع اخواني ..وفعلا قعدت بيتي ..جنني زوجي ..طلب اروح اعتذر لأمه رغم اني ما عملت شي ولا مرة رديت جواب ..ورحت واعتذرت وحكتلي انها مش زعلانه الا من ولادها لانهم بدهم يرموها عند الكناين..وفكرت انو هيك خلصت المشاكل ..بتفاجأ بزوجي بدو اروح اعتذر اخواته لبيوتهم ..رفضت بشدة ..حاولت اقنعه واجي معه بكل الأساليب رفض ..حكيتله بلحظة عصبية انو الي ما بحمي بيته مش زلمة ..وهالكلمة جرحته ع كلامه..وانا اعتذرت عنها فورا وهو قبل الاعتذار وطلب ما اعيدها ..زوجي ضل مصر اعتذر اخواته ورفضت ..حكيتله خليهم يجو عندي وانا بعزمهم واعتبرها صلح ..حكالي انا ما بقبللهم ياها ..وكان حلي الاخير التقي فيهم بمكان عام هو وافق ..وراح يحكي معهم بس هم رفضو ..ف رجع يصر علي اروح عندهم وقتها كان الي اسبوعين معه بعد جية خواته ..وهو ما بحكي معي غير بموضوع خواته وأهله ..وما بجيب خبزة للبيت لدرجة انو اخوي كان يجي يجيبلي شي اكله ..ضاقت فيي الحياة فحكيتله بدي اروح لاهلي يوم يومين اسبوع اسبوعين لتهدى القلوب ..وفعلا قام فورا يوصلني لاهلي وهو يحكي استهدي بالله وبنفس الوقت بلبس لحتى يوصلني ..بعد يومين من طلعتي رجعتله لقيته ببيت امه رحتله لبيت امه ..وكان شخص تاني .. عنيف ومتوحش بصرخ كتير كتير وما عرفت اتعامل معه حاولت أهديه حكالي .. المشكلة بطلت بيني وبينك .. المشكلة صارت بينك وبين كل العيلة و"انا قعدت كل العيلة وحكيتلهم كل حد عندو كلمة ع مرتي يحكيها"فعلا حكو ..واكيد ما حد ذكر شي منيح بدليل الوحش الي كان قدامي ..حكيت معه لساعات وحكالي ارجعي عند اهلك وبجي باخدك كمان يومين ..وما اجا .. بعد ٣ اسابيع حكو أهله لاخوي بدهم يطلقني ..اخوي نزل من السعوديه ليصلح بيني وبينه ..لانو رافض اني اتطلق بعد ست شهور زواج بس ..لما راح اخوي ليحكي مع زوجي ..لقى زوجي مجمع خوانه وزلام خواته ..حاولوا يصلحو وما زبطت .. هلأ الي عند اهلي خمس شهور ..زوجي رفع علي قضية طلاق بعد شهر من طلوعي من بيتي ..وانا رفعت نفقة .. بس حاولت كتير معه ..رحتله اكتر من مرة ..وحاولو كل الناس من جهتي يحكو مع زوجي بس زوجي مصر يطلقني .. بعد زواج ست شهور بس وخمس شهور عند اهلي ..لسا ما بدي اتطلق ..وبحبه وبدي حل قربت جلستنا الأخيرة ..وانا خايفه ..الطلاق ظلم كبير الي .. شو الحل؟

الحل: زوجك بايعك وهو ما عنده اي شخصية واللي باعك بيعيه وان شالله ربنا يعوضك احسن منه بعرف بنات كتير ما توفقوا ببداية زواجهم والله عوضهم بأزواج رائعين وبعدك صغيرة والعمر قدامك انفدي قبل ما يصير عندك اطفال ويصير الموضوع اصعب